Victor Eftimiu: Aforizma

Kohës nuk i pëlqen përveçse ajo që është ngjizur të mbetet. Ajo nuk i ruan çikërrimat.

Ngutja është armikja e përsosjes.

Kuptoj të luftoj për një ideal, por jo për një himerë.

Jam zvjerdhur nga fundërrinat, më jepni një maskara!

Gratë, kur martohen, fitojnë lirinë që humbin burrat kur martohen.

Klasikët më tepër citohen, se sa lexohen!

Më në fund e arrita idealin: pleqëria. Vetëm të zgjatet ca.

Çdo orë të cilën nuk e kalon i vetmuar është një orë që ia ke rrëmbyer jetës.

Jam modest, me një kusht të vetëm: të dihet!

Të siguroj, doktor, se e ndjek me përpikmëri regjimin që më ke caktuar, me të gjitha pakënaqësitë që më shkakton. Por a më garanton ti se ky regjim do të më shpëtojë nga një ftohje mushkërish, nga mbytja, apo nga rrotat e ndonjë kamioni? Jo. Atëhere lermë të qetë!

Harresa na duket tradhëti. Harresa është tradhëtia e epërme.

Gratë pyesin gjithmonë, por nuk e dëgjojnë përgjigjen, sepse përgatisin ndërkohë një tjetër pyetje.

Kur fillon t’i zgjedhësh femrat, është shenjë se po plakesh.

Të hartosh synime nuk domethënë se po qeveris.

Gratë të duan hero, por ta ndalojnë luftën.

Fakti që asnjë i vdekur nuk u kthye mbrapsht, dëshmon se të shumtët nuk kanë kujtime fort të këndshme që këtu.

Llogarite gjithmonë hasmin më të fuqishëm nga sa do të doje të ishte.

Mos fli mbi dafina. Lavdia ndalet në çastin kur harron se je prore një debutues.

Trajta reale e lumturisë është shpresa. Kush nuk shpreson, s’mund të jetë i lumtur.

Shpesh njerëzit pa asnjë cilësi janë më të durueshëm se sa ata pa asnjë mangësi.

Ka libra dhe drama që, ndonëse të botuara, mbeten të pabotuara. Iu vjen radha një ditë!... Janë ringjallje ngadhnjimtare.

Lexuesi është liqeni që di të bëjë rrathë të hijshëm, plot valë të kadifenjta e muzgore, prej krateresh hëne, kur e godet në zemër guri i hedhur nga bregu.

Librat na mësojnë, por nuk na udhëheqin. Nuk kam vrarë nën ndikimin e romaneve me krime, siç nuk jam vetëvrarë pas Verterit, dhe nuk jam bërë murg duke lexuar Jetët e Shënjtorëve.

Zgjodhi e shqipëroi A.-Ch. Kyçyku