Kopi Kycyku: Prit!

(Duke marrë shkas nga leximi i Lutjeve dhe i Librave të Shënjtë)

Të kam thirrur me dëshpërim, o Zot, me drithma, duke vajtuar,
Kam dëgjuar zërin Tënd të ëmbël që gjithkënd magjeps, mahnit,
T’u luta të më japësh dritë, udhën e drejtë për të më treguar,
Me mirësinë e pamatë më the veç kaq: “O biri im i dashur, PRIT!”

Më mësove të vij tek Ti, të kërkoja dhe do më jepje, vetëm të besoja,
Premtove se do të më ndihmosh kudo që të jem, edhe në infinit,
Por ndjehesha i humbur dhe të thërrisja prapë, papushim vajtoja,
Ti më përgjigjeshe butë me durim: “O biri im i dashur: PRIT!”

Isha i zhgënjyer, e padrejtë dhe e tmerrshme më dukej jeta mbi dhé, 
Shikoja nga qielli me pafuqi e përsërisja: “Çfarë të pres më?”
Atëhere zbrite tek unë, më vështrove në sy e më the:
”Deshe një shënjë? Kaq kishe dashur ti? Një zë?”

Shtove: “Mund t’i lëviz malet edhe ta fik pa ngurruar diellin,
T’i ringjall krejt të vdekurit dhe ta përflak në çast qiellin,
Por po të të tregoja se çfarë të zgjidhje që të ndjeheshe mirë,
Do të kishe përgjigje për të gjitha, por të më takoje s’do kishe më dëshirë.

Nuk do të mundje të ndjeje dashurinë me të cilën shenjtorët i qarkoj,
Nuk mund të merrje fuqinë të cilën të pashpresëve ua dhuroj,
Nuk do të prisje i heshtur një rreze që largon retë e dëshpërimit,
Nuk do të shijoje qetësinë e shenjtë që vjen pas mundimit!

Nuk do të dije të ecje me besim tek unë, nuk do shihje që pranë teje rri, 
Zemra jote e turbulluar nuk do të kërkonte të gjente tek unë qetësi!
Nuk do ta njihje plotësisht as për nga larg dashurinë time qiellore,
Që ta mbush jetën me paqe e me plot dhunti hyjnore.

Po qe se dhembja jote do të zgjatte vetëm një çast, ti nuk do të luftoje! 
Nuk do të dije ç’është ngadhnjimi, as ç’mund të kesh falë vetëflijimit tim, s’do ta kuptoje!
Mund të përmbusheshin ëndrrat e tua, por malli yt për mua do të davaritej,
Nuk mund të të bëja ty një perlë të thesarit tim, gjithçka do të venitej!

Pra, o biri im, çapitu mes stuhive dhe mendo ditët e lumtura, siç thua, 
Duke ditur që dhurata më e madhe është takimi me mua!
Edhe në mos gjetsh përgjigje dhe jeta të duket e padrejtë, të mërzit,
Mos harro që jam me ty atëhere kur me durim të them: „PRIT!“

18 Gusht 2016