Poetă şi traducătoare albaneză stabilită în Franţa.
Vjeshtë
Hesht
Dhe ke me ndigjue
Si shkapetet shiu
Iluzionit që lind
Në zemër të dimnit
Hesht
Dhe ke me pa
Sesi pema e gjallë
Vdes si nji gjeth
Hesht
Dhe ke me ndie
Sesi duert e mia
Pikojnë iluzionin
Mandej
M’ thuej se Dielli
Ka me ardhë deri këtu.
(Tetor 2010)
Sjell nji tingulli zani yt
Mbi fijen e barit ndër flokë t’ mi
Zhytet
E del si dorë
Sa herë mbi kambët e tua
Zbret nj’ai yll
Vdes e ringjallet
Mbi botën që tenton të shembet
Kur shtegtojnë lamtumirat.
(11 Octobre 2010)
Asht deti
Që shprazet në kraht e saj
Qyteti porti
Dritat e ndezuna të nji nate të fikun
Të mëdhej sytë e saj
Trashigimtarë të nji ideje modeste tokash t’premtueme
Të thellë sa deti
Lakuriq pikojnë mbi gjunjtë e kohës.
(Tetor 2010)
Sapo bahemi ata që jemi
Duhet me u largue
Prej aty ku jemi
.................................
Ne lindim ndër riviera
Mandej fryen era
E toka vjen e na merr
18 Octobre 2010
Edhe pak…
sa t’lexoj kohën n’ vargun e njelmët
që naivisht m’ka përqafë,
e krejt ajrin kam me e sjellë kah ti.
N’ turmën e reve
që si ortek ka me u dyndë,
nji gjerdan me perla ujit kam me vu’ n’qafë
e at’herë ndoshta,
si t’parën herë ke me u gzue.
13 Janar 2011
Ikën…
edhe ata që zbritën dikur prej naltësisht marramendëse
me dëshirën me na falë nji copë qiell ;
ikën të gjujzuem në nji tjetër mënyrë.
Bashkê me ta edhe koha u largue
e na mbetëm sterilë në gropën e orës
pa mujt’kurrë me matë
atë çka tashma kishim braktisë.
31 JANAR 2011
Ç ka do të ketë e vërteta
Aq të trishtueshme
Sa jeta e gzueshme
E ban me u mshehë ?
Në fillim ishte Fjala,
Por cila?
Me Jetue apo me Vdekë ?
Edhe disa kohë shpresë...shpresë me jetue ...
ose me vdekë .
Me u largue? , me ikë për mos me vdekë? ,
Apo ndoshta me vdekë gjallë
për mos me jetue të vdekun...?
(novembre 2009)
Unë isha hije për vedi
e s’mujshe me ra n’absurdin tragjik të dritës tande,
e qiri i ndezun mbi tavolinë
s’mund të sillte kurrsesi
ndriçimin e duhun n’at ‘ shi frymëmarrjesh.
Nën dihatjet e shkallës së drujtë
m’u duke baladë e idhët qiejsh,
fantazëm me pallton e zezë të syve të tu
edhe pse une isha hije.
(dhjetor 2010)
Ne jemi çka e kaluemja na dha për emën
Kujtim i natyrshëm gjallnue mbas nji koma të gjatë
Na duhet kohë me shue etjen në lumin e qetsisë
Me prekë majën e malit
E prapë me u rrokullisë
E me ra n’ tokën e nji bime të re
Kujtim i natyrshëm gjallnue mbas nji koma të gjatë
Na duhet kohë me shue etjen në lumin e qetsisë
Me prekë majën e malit
E prapë me u rrokullisë
E me ra n’ tokën e nji bime të re
(15 shkurt 2011)